Avropa İttifaqı (Aİ) ölkələri müharibə səbəbindən Ukraynanı tərk etmiş vətəndaşlar üçün müvəqqəti müdafiə rejiminin 4 mart 2028-ci il tarixinədək uzadılmasını razılaşdırıb.
“Əks-səda” xəbər verir ki, bununla belə, status Ukraynanın müdafiə ehtiyaclarını təmin etmək məqsədilə yalnız bu ölkə qarşısında öz hərbi vəzifələrini yerinə yetirmiş yeni müraciətçilərə veriləcək.
Aİ Şurasından bildirilib ki, müvəqqəti müdafiə rejiminin müddətinin uzadılması 4 milyondan çox ukraynalıya yaşamaq, işləmək, səhiyyə və sosial xidmətlərdən, eləcə də təhsildən yararlanmaq imkanı ilə hüquqi müəyyənlik təmin edəcək.
Hərbi vəzifələrin yerinə yetirilməsini təsdiqləmək üçün yeni müraciətçilər, xüsusən də, Ukraynadan qanuni yolla çıxış qeydi olan pasport və ya xidmətdən azad edilməni, yaxud müvafiq öhdəliklərin icrasını təsdiq edən kağız və ya elektron formada sənəd təqdim etməli olacaqlar.
Aİ Şurasının qərarı yaxın həftələrdə rəsmən təsdiqlənəcək və Avropa İttifaqının rəsmi jurnalında dərc olunduqdan sonra qüvvəyə minəcək.
Müvəqqəti müdafiə mexanizmi ilk dəfə 2022-ci ilin martında Rusiyanın Ukraynaya genişmiqyaslı müdaxiləsi başladıqdan sonra Aİ tərəfindən aktivləşdirilib. 31 may 2026-cı il tarixinə olan məlumata görə, 4,38 milyon nəfər onun təsir dairəsinə düşürdü.
