Argentinanın paytaxtı Buenos-Ayresdə nümayişçilərlə polis arasında toqquşmalar baş verən etiraz aksiyası zamanı azı beş nəfər xəsarət alıb.
Əks-səda xəbər verir ki, azı 10 etirazçı saxlanılıb.
Minlərlə insan “Şəxsi mülkiyyətin toxunulmazlığı haqqında” qanun layihəsini müzakirə etmək üçün Konqresin qarşısında etiraz aksiyası keçirib. Etiraz aksiyası başladıqdan bir neçə saat sonra etirazçılarla hüquq-mühafizə orqanlarının əməkdaşları arasında toqquşmalar baş verib.
Nəşrin məlumatına görə, etirazçılar polisə daş və butulkalar atıblar. Polis kütləni dağıtmaq üçün gözyaşartıcı qaz, su şırnaqları və rezin güllələrdən istifadə edib.
Hüquq-mühafizə orqanlarının azı üç əməkdaşı başından xəsarət alaraq xəstəxanaya yerləşdirilib. Rezin güllələrin dəydiyi iki jurnalist də yaralanıb.
Narazılığa əcnəbilərə torpaq satışı qaydalarını dəyişdirəcək qanun layihəsi səbəb olub. Ən mübahisəli bənd xarici vətəndaşların torpaq mülkiyyətinin icazə verilən faizini 15 %-dən 25 %-ə qədər artıran maddə olub.
Senat sənədi nəzərdən keçirməzdən əvvəl hakimiyyət mübahisəli müddəanı ləğv edib, lakin etirazlar davam edib.
