“Tanrının zirehi: Ultimatum” filminin rəsmi səhifəsində filmin Bakıdakı çəkilişlərindən videokadrlar yayımlanıb.
Əks-səda xəbər verir ki, video kinofranşizanın Salem Jackiechan tərəfindən idarə olunan rəsmi instaqram səhifəsində yayımlanıb.
Videoda əvvəlcə təyyarə və çəkiliş qrupunun Azərbaycanın paytaxtına gəlişi göstərilir. Sonra hadisələr birbaşa çəkiliş meydançasında cərəyan edir: Ceki Can beynəlxalq komandanın üzvləri ilə birlikdə çəkilişlərin yeni mərhələsinin başlamasına həsr olunmuş ənənəvi mərasimdə iştirak edir. Aktyor əlində film lövhəsini tutur, rejissor və layihənin digər iştirakçıları ilə ünsiyyət qurur, bundan sonra çəkiliş qrupu ümumi foto üçün obyektiv qarşısında durur. Həmçinin, çarxda çəkilişlərə hazırlıq anları və çəkiliş texnikası göstərilir.
Bakı mərhələsinin başlanması çəkilişlərin uğurlu startının rəmzi olan kino boşqabının sındırıldığı ənənəvi mərasimlə müşayiət olunub.
“Ultimatum” artıq kulta çevrilmiş “Tanrının Zirehi” franşizasının dördüncü filmidir. Baş rolu məşhur aktyor Ceki Çan ifa edir. Aktyor yenidən əfsanəvi macərapərəst “Asiya şahini” obrazını canlandırır. Bakı filmin bədii konsepsiyasına uyğun olaraq çəkiliş məkanı seçilib. Süjetə görə, hekayənin yeni bölümü Xəzər dənizinin ətrafında cərəyan edir. Buna görə də çəkilişlərin bu mərhələsi Azərbaycanda keçirilir.
Filmin bir sıra əsas səhnələri Bakıdakı müxtəlif məkanlarda lentə alınacaq.
“Tanrının Zirehi: Ultimatum” filminin çəkilişləri 2026-cı ilin payızınadək davam edəcək. Filmin premyerasının 2027-ci ildə keçirilməsi planlaşdırılır.
