Avqust ayında Panama kanalından tranzit üçün gündəlik hərraclar orta hesabla 1,1 milyon dollar təşkil edir ki, bu da keçən ilin göstəricisindən 16 dəfə çoxdur. Qiymət artımı iki əsas amillə bağlıdır – Hörmüz boğazının bağlanması və iqlim dəyişiklikləri.
Əks-səda xəbər verir ki, bu barədə “The Financial Times” nəşri yazır.
“Argus” analitik şirkətinin məlumatlarına görə, kanalın böyük şlüzlərindən istifadə üçün orta qiymət 2,5 milyon dollara çatıb. Neopanamax və Panamax tipli şlüzlərdən gəmilərin keçid dəyəri müvafiq olaraq 3,78 milyon dollara və 2,63 milyon dollara qalxıb. Keçən ilin avqust ayında qiymət 150 min dollar səviyyəsində idi.
Əvvəllər gəmiçilik şirkətləri Panama kanalından keçidi əvvəlcədən endirimli qiymətə sifariş edə bilirdilər. İndi isə trafikin təxminən 30%-i hərrac nəticələri ilə müəyyən edilir.
Panama kanalında yükdaşımaların dəyəri ABŞ və İsrailin İrana qarşı hərbi əməliyyatlara başlamasından sonra artmağa başladı ki, bu da Hörmüz boğazının bağlanmasına (o vaxt dünya neft tədarükünün təxminən 20%-i) və logistik marşrutların digər kanallara yenidən bölüşdürülməsinə gətirib çıxardı. Digər səbəb Sakit okeanın bəzi hissələrinin anormal istiləşməsi (El-Ninyo hadisəsi) ilə bağlıdır ki, bu da ayrı-ayrı regionlarda quraqlığa səbəb olur.
“Argus” proqnozlaşdırır ki, El-Ninyo səbəbindən Panama kanalında suyun səviyyəsinin düşməsi davam edəcək. Yalnız son bir ay ərzində su yolunun administrasiyası gəmilərin keçidi üçün icazə verilən su səviyyəsini üç dəfə azaldıb: adətən bu, 15,2 m təşkil edir, sentyabrın ortasına qədər isə 14,4 m-ə çatacaq. Bu, Panama kanalının girişində növbələrə gətirib çıxarır.
