Süni intellekt əsaslı musiqi yaratma platforması Suno AI ilə bağlı ortaya çıxan yeni məlumatlar şirkətin modelini öyrətmək üçün internetdən milyonlarla mahnı və səs yazısını topladığını göstərir. 404 Media-nın yaydığı məlumata görə, şirkətə edilən kiberhücum nəticəsində sızdırılan mənbə kodu Suno-nun təlim prosesinin detalları barədə indiyədək məlum olmayan faktları üzə çıxarıb.
Əks-səda xəbər verir ki, sızdırılan fayllara əsasən, “youtube_music” adlı məlumat bazasında YouTube-dan götürülmüş 2 milyondan çox musiqi parçası qeyd olunub. Bundan başqa, Deezer, Genius və Pond5 kimi platformalardan da on minlərlə saatlıq musiqi və səs materiallarının toplandığı bildirilir. Kodlarda həmçinin vokalları daha dəqiq öyrənmək üçün YouTube-da yerləşdirilmiş a cappella versiyaların xüsusi şəkildə axtarıldığı qeyd edilir.
İddialara görə, Suno YouTube-un məhdudiyyətlərini keçmək üçün Bright Data adlı proksi xidmətindən istifadə edib. Bununla yanaşı, təxminən 420 min podkastdan ümumilikdə 1 milyon saata yaxın danışıq səsi də modelin təlimi üçün toplanıb. Əslində Suno daha əvvəl məhkəmə sənədlərində modelini “internetdə açıq şəkildə mövcud olan, keyfiyyətli musiqi faylları” üzərində öyrətdiyini etiraf etmişdi. Lakin yeni sızma bu prosesin hansı üsullarla həyata keçirildiyini daha detallı şəkildə göstərir.
