Britaniyanın sahil mühafizəsi La-Manş boğazında 140 qanunsuz miqrantı daşıyan gəmini saxlayıb.
Əks-səda bu barədə “Sky News” telekanalına istinadən xəbər verir.
Məlumata görə, əməliyyatda xilasetmə qayıqları, bir helikopter və Britaniya sahil mühafizəsinin təyyarəsi iştirak edib. Saxlanılan gəmi Fransanın şimal-qərbindəki Normandiya bölgəsində yerləşən Jobur kommunasından İngiltərənin Hempşir qraflığının sahillərinə doğru hərəkət edirdi.
Miqrantlar Krallığın Milli Xilasedici Cəmiyyətinin xilasetmə qayıqlarına köçürülərək Portsmuta aparılıb. Onların sonra miqrantlar üçün müvəqqəti saxlama mərkəzinin yerləşdiyi Manstona aparılacağı gözlənilir.
2018-ci ildən bəri 205 000-dən çox qanunsuz miqrant şişmə qayıqlarla La-Manş boğazından Böyük Britaniyaya keçib. “Brexit”in lehinə əsas arqumentlərdən biri olmasına baxmayaraq, qanunsuz miqrasiya məsələsi Böyük Britaniya üçün Avropa İttifaqından çıxdıqdan sonra daha da aktuallaşıb.
