Rusiyanın bir neçə regionuna kütləvi dron hücumu nəticəsində ölən, yaralanan və zərərçəkənlər var.
Əks-səda xəbər verir ki, bu barədə Rusiya Müdafiə Nazirliyi və regional qubernatorlar məlumat veriblər.
Rusiya Müdafiə Nazirliyinin məlumatına görə, hava hücumundan müdafiə sistemləri gecə ərzində ölkənin bölgələri üzərində Ukraynaya məxsus 276 stasionar qanadlı dronu təyyarəsini tutaraq məhv edib.
Rostov vilayətinin qubernatoru Yuri Slyusar bildirib ki, Rostov-na-Donu şəhərində baş verən hava hücumunda iki nəfər həlak olub. Səkkiz sakin müxtəlif dərəcəli xəsarətlər alıb, onlardan ikisinin, o cümlədən bir yeniyetmənin vəziyyəti ağırdır.
Şəhərin Jeleznodorojnı, Proletarski və Leninski rayonlarında dağıntılar qeydə alınıb. Dron zərbələri nəticəsində özəl müəssisədə, anbarlarda, bir neçə fərdi evdə və avtomobillərdə yanğınlar baş verib. Şəxsi evlərə, çoxmənzilli binanın yuxarı mərtəbələrinə və sosial müəssisəyə də ziyan dəyib.
Belqorodda Ukrayna dronlarının hücumu nəticəsində 12 nəfər, o cümlədən iki uşaq xəsarət alıb. Şəhərdə çoxmənzilli binadakı bir neçə mənzil və park edilmiş 15-dən çox avtomobil yanıb. Bundan əlavə, bir fərdi ev qismən dağılıb, ərazidəki digər çoxmənzilli binalara ziyan dəyib.
Yaroslavl vilayətinə dron hücumundan sonra Yaroslavl şəhərinin kənarında Moskvaya gedən nəqliyyatın hərəkəti müvəqqəti olaraq dayandırılıb.
