Krasnodar və Dağıstanda (Rusiya) “Ozon”un logistika obyektləri avqustun 24-nə keçən gecə hücuma məruz qalıb, güclü yanğın başlayıb.
Əks-səda xəbər verir ki, bu barədə şirkətin mətbuat xidməti “Telegram”da məlumat yayıb.
Məlumata görə, Mahaçqalada pilotsuz uçuş aparatlarının zərbələri zamanı bir neçə nəfər xəsarət alıb.
“Bütün sistemlər ştat rejimində işləyib, biz əməkdaşları operativ şəkildə təxliyə etdik”, – məlumatda bildirilib. Hadisə yerində fövqəladə xidmətlər işləyir. Anbarların işi dayandırılıb.
Məlumatda qeyd olunub ki, anbarda olan mallar vitrindən gizlədiləcək, onları sifariş etmək mümkün olmayacaq, bu anbardan çatdırılan sifarişlər isə ləğv ediləcək və onlara görə pul qaytarılacaq.
“Ozon”un obyektləri ilk dəfə avqustun 22-nə keçən gecə Samara vilayətində hücuma məruz qalıb. Bundan əvvəlki iki ay ərzində isə “Wildberries” anbarlarına zərbələr endirilirdi. Avqustun ortalarında Ukrayna Müdafiə Nazirliyi bildirmişdi ki, həmin vaxta qədər “Wildberries”in 10 ən böyük logistika habından 7-si artıq sıradan çıxarılıb.
