Aralıq dənizinin Afrika sahilində yerləşən və miqrasiya böhranının episentrinə çevrilmiş Seuta muxtar şəhəri ərazisində vəziyyət tədricən normala qayıdır.
Əks-səda xəbər verir ki, bu barədə yerli hakimiyyət nümayəndələrinə istinadən “Hespress” portalı yazıb.
Onların məlumatına görə, ərazinin təmizlənməsi, nəqliyyatın hərəkətinin bərpası və iğtişaşların fəsadlarının aradan qaldırılması istiqamətində işlər aparılır. Miqrantların polislə toqquşması zamanı yandırılmış avtomobillərin qalıqları ətraf küçələrdən yığışdırılır.
“Bab-Sebta” sərhəd keçid məntəqəsinə Seutanı tərk edən qeyri-qanuni miqrantları yaxınlıqda yerləşən Mərakeşin Fnidek şəhərinə daşıyan mikroavtobuslar çatmağa başlayıb. Seuta və Fnidek arasındakı yol sahəsində nəqliyyatın hərəkəti hər iki istiqamətdə bərpa olunub.
Bununla yanaşı, sərhəd keçid məntəqəsində və ətraf ərazilərdə miqrantların Mərakeş ərazisinə qayıtmasına nəzarət edən gücləndirilmiş polis iştirakı qalmaqdadır.
Portalın Mərakeş təhlükəsizlik xidmətlərindəki mənbəsinin məlumatına görə, son günlər “Bab-Sebta” sərhəd keçid məntəqəsi yaxınlığında və Fnidekdə baş verən toqquşmalar zamanı 70-ə yaxın şəxs saxlanılıb. Onlara qarşı, o cümlədən adam öldürməyə cəhd, qəsdən yandırma, dövlət və özəl mülkiyyətə qarşı vandalizm ittihamları irəli sürülüb.
