Londonun Vulviç Kral Məhkəməsi 2024-cü ildə Londonun nəqliyyat idarəsinə (“Transport for London”, TfL) kiberhücum həyata keçirən iki britaniyalı xakeri ümumilikdə 11 il müddətinə azadlıqdan məhrum edib.
“Əks-səda” xəbər verir ki, bu barədə “Reuters” məlumat yayıb.
Agentliyin məlumatına görə, 20 yaşlı Talha Cübeyr və 18 yaşlı Ouen Flauers ötən ay 2024-cü ilin avqust və sentyabr aylarında TfL-in informasiya sistemlərinin sındırılmasında təqsirkar olduqlarını etiraf ediblər.
Etiraf məhkəmə prosesinin ilk günündə edilib. Məlumata görə, TfL-ə edilən kiberhücumun nəticələrinin aradan qaldırılması 29 milyon funt sterlinqə (təxminən 39,2 milyon dollar) başa gəlib.
Bundan əlavə, O.Flauers ABŞ-də iki qeyri-kommersiya səhiyyə təşkilatına edilən kiberhücumlarda da təqsirini etiraf edib. O, ikinci hücum həyata keçirilən zaman saxlanılıb.
Məhkəmə təqsirləndirilən şəxslərin hər birini 5,5 il müddətinə azadlıqdan məhrum edib.
